ТВ1 телевиз хамтран ажиллах хүсэлт гаргалаа

Жижиг, дунд үйлдвэрлэл үйлчилгээг дэмжих зорилгоор ТВ1 телевиз цуврал нэвтрүүлэг бэлтгэн хүргэхээр зорьж байгаа аж. Уг ажлын хүрээнд өнөөдөр /2022.11.15/ Хан-Уул дүүргийн Жижиг дунд үйлдвэрлэлийг дэмжих төвийн дарга Н.Дорждуламтай тус телевизийн нэвтрүүлгийн баг уулзаж хамтран ажиллах санал танилцуулж, мэдээлэл солилцлоо.

Олон нийтийн мэдээллийн хэрэгсэл их байдаг ч гарааны бизнес, өрхийн үйлдвэрлэл эрхлэгч нарыг нийтэд сурталчлах, бараа бүтээгдэхүүнийг олонд түгээн сурталчлах эфирын цаг хангалттай байдаггүй. Тэгвэл ТВ1 телевизийн хамт олон "Амьдрах ухаан" хөтөлбөрөөрөө өрхийн үйлдвэрлэл, үйлчилгээ эрхлэгчид, жижиг дунд үйлдвэрлэл эрхлэгчдийн үйл ажиллагааг олон нийтэд таниулан сурталчилан хүргэдэг билээ.

Энэ хөтөлбөрийнхөө хүрээг тэлж нийслэлийн төвийн 6 дүүргийн жижиг дунд үйлдвэрлэл эрхлэгчдийн дунд "Бизнесийн гараа" реалити нэвтрүүлэг бэлтгэн хүргэхээр бэлтгэл ажил хангаж байгаа нь энэ аж.

Уг цуврал нэвтрүүлэгт оролцох хүсэлтэй Жижиг дунд үйлдвэрлэл эрхлэгчид төвийн 7000-7012 утсаар холбогдож мэдээлэл авах боломжтой.