ЖДҮҮ ЭРХЛЭГЧДИЙН НАМРЫН ҮЗЭСГЭЛЭН ХУДАЛДАА Д.СҮХБААТАРЫН ТАЛБАЙД ЭХЭЛЛЭЭ

Нийслэлийн жижиг, дунд үйлдвэр үйлчилгээ эрхлэгчдийн “DAYs4SME EXPO-2022” намрын үзэсгэлэн худалдаа өнөөдөр буюу 2022.10.20-нд Д.Сүхбаатарын талбайд нээлтээ хийлээ. Үзэсгэлэн худалдаанд нийслэлийн 9 дүүргийн жижиг, дунд үйлдвэр, үйлчилгээ эрхлэгч аж ахуйн нэгж, иргэд оролцож байна.

Хан-уул дүүргээс дүүргийн Жижиг, дунд үйлдвэрлэлийг дэмжих төвд бүртгэлтэй үйл ажиллагаа нь тогтвортой явагддаг 14 аж ахуйн нэгж, иргэд оролцож өөрсдийн бараа бүтээгдэхүүн үйлчилгээг олон нийтэд сурталчлан, борлуулалтын орлогоо нэмэгдүүлэх чиглэлд анхааран ажиллаж байна.

2022.10.23-ны өдөр буюу Ням гарагийн амралтын өдрийг дуустал Д.Сүхбаатарын талбайд явагдах энэхүү үзэсгэлэн худалдаанд ноос ноолуур, арьс шир, үндэсний хувцас, зөгийн бал, байгалийн ургамлын гаралтай эм бэлдмэл, хүнсний ногоо, цагаан идээ гэсэн олон нэр төрлийн үндэсний үйлдвэрийн бүтээгдэхүүн үйлдвэрийн үнээр худалдаалагдаж “Үйлдвэрлэгчээс хэрэглэгч” гэсэн уриаг бодитоор хэрэгжүүлэх боломжтой.

Цар тахлын нөлөөгөөр сүүлийн 2-3 жилд жижиг, дунд үйлдвэр эрхлэгчдийн хувьд борлуулалтын орлого эрс буурч, түүхий эд бараа материалын ханган нийлүүлэлт тасалдах, үнийн өсөлт зэрэг олон хүндрэлтэй нүүр тулсан. Иймд улсаас бодлогын хүрээнд энэ салбарыг дэмжихээр ажиллаж байгаагийн чухал хэсэг бол энэхүү үзэсгэлэн худалдаа бөгөөд үйлдвэрлэгчид түрээсийн төлбөргүй хамрагдаж байгаа нь давуу талыг олгож байна.

Хан-Уул дүүргийн Жижиг дунд үйлдвэрлэлийг дэмжих төвөөс үйлдвэр эрхлэгчдийг дэмжих бодлогын хүрээнд талбайн түрээсийн төлбөргүй үзэсгэлэн худалдаанд өргөнөөр оролцуулах, бараа бүтээгдэхүүнийг өөрийн сэтгүүлд үнэ төлбөргүй сурталчлах, сургалт мэдээллээр хангах зэрэг олон чиглэлд тогтмол үйл ажиллагааг хэрэгжүүлсээр байна.